Tónlistarskólinn í Grafarvogi býður upp nám á hin ýmsu hljóðfæri, þar á meðal; píanó, gítar, fiðlu, víólu, selló, þverflautu, harmóníku og bassa. Flestir nemendur skólans hefja nám í forskólanum sem er samþætt tónslistarnám og góður undirbúningur undir frekara nám í hljóðfæraleik. Einnig er starfrækt rytmadeild í samstarfi við Miðstöðina.
Kennt er samkvæmt aðalnámskrá tónlistarskóla. Námið skiptist í þrjá megináfanga; grunnnám, miðnám og framhaldsnám og lýkur hverjum áfanga með áfangaprófum, annars vegar í hljóðfæraleik og hins vegar í tónfræðagreinum. Námstími innan hvers áfanga er breytilegur og ræðst m.a. af aldri, þroska, ástundun og framförum. Miðað er við að flestir nemendur sem hefja hljóðfæranám 8-9 ára ljúki grunnnámi á þremur árum. Í mið- og framhaldsnámi eykst umfang námsins og sá tími sem tekur að ljúka áföngunum.
Að jafnaði fer hljóðfæranám fram í einkatímum. Í fullu námi fær nemandinn 2x 30 mínútna kennslu í aðalgrein í viku hverri. Einnig boðið upp á 2 x 20 mínútna kennslu í viku hverri fyrir yngstu börnin sem telst 66% nám.
Samhliða hljóðfæranámi sækja nemendur, 10 ára og eldri, tíma í tónfræðagreinum. Í grunn- og miðnámi er um að ræða samþætt nám í tónfræði, tónheyrn, hlustun, sköpun og tónlistarsögu. Í framhaldsnáminu taka við aðskildir tímar í hljómfræði, tónheyrn og tónlistarsögu.
Í náminu er lögð áhersla á samleik af ýmsu tagi og lögð er áhersla á að nemendur komi fram á tónleikum innan skólans, sem utan.